|
今次開帖想分享下自己轉運嘅經歷,尤其有d人想戴佛牌嚟轉運,我更加想將這段神奇經歷分享下!
其實,我自己未戴佛牌之前,拜咗四面神多年了,而且一直很得四面神關照,當時一年專程去曼谷還神有五、七次,根本亦無諗過要戴佛牌,雖然後來接觸咗佛牌呢樣嘢,但係戴牌(當然係四面神)只不過係讓祂可以常伴我左右而矣! 因為我一直都係直接去四面神寺廟參拜! 既然佢對我有求必應,咁我亦無需多想。
後來,有一段時間,運勢發生重大變化,簡單嚟講就係唔應該發生、冇可能發生嘅事全部發生,統統都係壞事,簡直係全無道理可言。當然,我繼續經常去參拜四面神 (無論順境逆境都無間斷,所以根本唔係咩無還神問題! ) 而我所祈求嘅嘢,點樣消災解難,當然都無發生!
但係神奇嘅事就開始出現:不知不覺間,喺我身邊突然出現咗好多做佈施做功德嘅機會,而且全部都唔係我平時日常生活、交際圈子可以接觸到。有一次上網search一d嘢 (完全無關係),竟然無意中發現佈施棺材嘅內容;之後機緣巧合又上了道場拜懺誦經,開始聞佛法。又有一次,同朋友食飯聚會,居然講起佢放生嘅事(但佢平時唔會講呢d嘢)。
就喺呢d神奇嘅際遇、指引出現之時,我亦開始慢慢投入這些佈施活動,同時,命運亦發生變化:當然唔係180度逆轉,由壞到好;而係無論眼前嘅事有幾大鑊、幾難解決,最終都出乎意料地,逢凶化吉、大事化小,小事化無。
而且,我發覺進行呢d佈施禮佛,每個嘅過程都極順利:例如去拜懺,明明個法會好多人,但都會意外得到好坐位、去放生又有好心人指點、去供僧明明別人等好耐,但自己遲咗出門,一去到只等咗十五分鐘個師傅就到等等……
而我喺這段時間,才開始戴牌:並不是靠佛牌轉運,而係等佢方便d指導我去行善佈施咋!
我個人覺得,想靠佛牌轉運係無可能㗎!
第一,我本身深得四面神關照,以前未戴佛牌之前,我年年剩係去曼谷還願,都五、七次,如果靠神佛可以轉運、改變命運,咁四面神郁下隻手指,我都改咗運啦,佢駛唔駛咁大費周章教我佈施、做功德、誦經、放生呀!
第二,泰國果d珍貴嘅佛牌老牌、有神奇事蹟嘅牌,好多已經落入皇室、高官、富豪之手,好似屈當二咁,黃金版只做咗9面,當時就已經獻俾皇室、政府官員(前總理他信有一面)。
如果戴佛牌可以轉運,咁d達官貴人已經改變命運先啦,人地有錢、又有權有勢,仲做到總理,想要咩好牌、老牌、名牌、百萬佛牌都有啦,如果佛牌可以轉運,咁果個前總理仲駛俾人推翻、流亡國外?
泰國好多政府官員都有戴佛牌,咁個個都無往而不利? 睇下泰國有幾多個被政變推翻嘅國家元首先啦!
其次,如果有d咁靈驗,可以轉運嘅佛牌,一早被高僧身邊弟子、支持間寺院嘅善信、政府官員摞哂啦,再唔係個牌商都自己要啦,戴咗就可以反敗為勝喎,幾大都唔賣,點可能幾千銀賣俾你?
第三,泰國曼谷個四面神法力無邊,幫助無數善信,大家都唔會懷疑佢有幾「好力」啦,咁點解四面神會被炸呢? 神佛有神佛因果,人有人嘅因果,如果咁容易可以改變命運、扭轉因果,咁四面神都改變自己命運(可能佢都改變咗一部分),保住自己個法身先,仲會被人炸?
所以,諗住戴個佛牌就可以轉運,實在係唔work㗎!
|
評分
-
8
查看全部評分
-
|