馬年算帳 敲爛玄學家的30個頭盔

danielchung

唔好太迷信


【收市閒情】馬年算帳 敲爛玄學家的30個頭盔



馬年收爐在即，又到風水佬和你吹吹水之時。炒股話晒都係偏財，玄學嘅嘢參考吓又幾咁閒。搵一班玄學家預測明年市況，大把人會做，千頌C我比較鍾意玩秋後算帳。蘋果財經上年搵咗四位著名風水佬，分別係麥玲玲、蘇民峰、沈大師同埋李丞責批馬年股市。如是者，我將篇報道拆骨，一句一句，拆成30句，對吓有幾準。結果如下：


麥玲玲：


１：「金融、銀行等要小心，股票屬金，火旺年股民要較克制」
結果：今年證券、銀行、內險、以至係大市，都係升的！不過，嚴格來講，佢係冇錯。做人做事，升市跌市，人生一年365日，要小心、克制是always right！中！


２：「正月（2月4日至3月5日）外圍局勢不穩，交投淡靜，市場有回吐壓力」
結果：大市於低位徘徊。中！


３：「3月及4月（4月5日至6月5日）略有炒賣氣氛，眼明手快者可望有進賬」
結果：大市個浪向上移，都算有氣氛嘅，至於後面嗰句，同我講靚嘅人多人追有咩分別？


４：「5月（6月6日至7月6日）雖有財星透出，但同時危機四伏」
結果：射十二碼，一係入，一係唔入。中！


５：「6月（7月7日至8月6日）天合地合之月，上落更大，慎防市況隨時逆轉」
結果：大市衝高，的確上得好快，後面嗰句，相信係一個頭盔，中！


６：「下半年不是看得太淡，農曆7月（8月7日至9月7日）會有好現象」
結果：大市見全年高位，中！


７：「10月（11月7日至12月6日）整體特別理想，投資者回復信心，氣氛不俗」
結果：成交係多嘅，中！


８：「國與國關係緊張，四六入中宮，報紙、傳媒控制性強，有點像以前的文字獄，會是全球性。」
結果：好中！


蘇民峰：


１：「大市應該呈『先跌後升』格局，但要留意因經濟進一步踏入穩固期，故不宜過份進取」
結果：先跌後升係岩。投資價格可升可跌，大家不宜過份進取，果然係真理。中！


２：「上半年即使上升也宜先行套現，切勿過份樂觀，得些好意須回手」
結果：呢一句套入春夏秋冬都得！阿媽教落，任何事都唔好去到盡，得些好意須回手。中！


３：「1月先入一批貨（股票），5至6月立夏之際再入一批，儲到秋冬就是收成之時」
結果：的確下半年市好啲，中！


６：「大致上是『冇得玩長線』，宜買一些防守性強的股票」
結果：你唔好走去諗公用股、收租股股價點，因為買呢類股票，又係永遠是對的，中！


７：「投機炒賣可免則免，切勿輕舉妄動」
結果：蘇師傅做咗投資推廣署代言人？不過都係岩！中！題外話，殼股今年炒得好勁


沈振盈：


１：「『群劫爭財』四字歸納，即『唔夠錢』，市場會出現因財而起的爭執及官非」
結果：在下有個日文名，叫「長期糧尾」，中！


２：「樓市及經濟增長均會放緩，『好多嘢會由好變差』」
結果：中一半啦！樓市2014年又創新高。


３：「應用於股市，成交及炒風同樣不會熱烈，全球市場情況亦然，是值得提防的一年，『小心為上，持盈保泰』」
結果：中！不過美股、日股今年好勁囉


４：「指數在新曆2月起即走弱」
結果：中！


５：「直至4月造底」
結果：全年低位喺3月，4月整固，都算做中！


６：「持續低位徘徊至6月才反彈，故今年夏至秋天是最佳投資時刻」
結果：中！


７：「惟9月後大市又再走弱」
結果：中！


８：「直至11月後又才會掉頭走上」
結果：中！


李丞責：


１：「有人事政治事件，投資應持保守態度，首季宜獲利」
結果：前面一句中！後一句，跟佢炒就慘了，錯！


２：「第二三季問題浮現」
結果：中！


３：「第四季平復」
結果：中！


４：「料恒指23000點為中線，上下為24400至21000點」
結果：中！大市大部份時間，的確係呢個位徘徊


５：「流月農曆四月至七月最有機會下調」
結果：呢段時間，大市炒高。錯！


６：「大多數股災在新曆4及11月之間，都是小提防的月份」
結果：4及11月，你講晒啦！中！


７：「馬羊宜持保守態度」
結果：又講真理，中！


結論：
麥玲玲、蘇民峰預測大致準確，但講嘢非常圓滑，點睇都會係中。沈大師講嘢話一就一，唔會點戴頭盔，講走勢方面，又真係中晒！至於李丞責呢……你有眼睇。有個共通點係，個個都叫你保守、小心，如果做散戶，吓吓都咁保守、咁小心，唔好炒股去做定存算啦。


所以話，玄學嘅嘢，聽完咪算。你覺得「風水佬呃你十年八年」，但信嘅大有人在。不過在反智的年代，比起講得出「走私奶粉案升代表執法得嚴」、「廉潔程度變差因廉署破大案」呢類指黑為白說話嘅人，我寧願相信風水佬嘅流年預測。


by千頌C@堆填區



Source From: Apple Daily Hong Kong
17/2/2014

RickyLam@FB

我屋企人帶過我見馬尾蘇，，有錢食咗佢更好

小小牛

被一個反智甘做奴隸的政府統治下, 我寧願相信風水佬嘅流年預測