[轉貼]泰國陰牌恐怖事件

kikiki

Regina係一個外型討好但脾氣好差ge女子，因為佢ge脾氣實在太難頂，所以一直以來無一位男朋友可以「頂」佢「頂」多過半年。眼見身邊長相俾自己差ge女子都嫁得七七八八，Regina真係好想30歲之前可以嫁得出。可能人到絕望時思想真係會變得混亂，Regina居然相信一則報紙廣告所講 —- 借助泰國陰牌ge力量可以改善「姻緣」。Regina按照報紙所載電話聯絡「佛舍」職員，當時佛舍職員同Regina講，佢地ge「佛牌」唔係人人都可以帶走，一定要「善心人」親身去到佛舍同「佛牌」交流左先，如果係「有緣人」的話就會同「佛牌」有交感，响咁樣ge情況下先至可以帶走佛牌。
Regina 覺得呢間佛舍好「正派」，所以Regina就叫佢ge好朋友Maggie陪佢去佛舍。其實Maggie完全唔贊成Regina買佛牌，不過當時Regina堅決要去佛舍，為免Regina一個人上去俾人呃，所以Maggie就免為其難陪Regina去佛舍。
去到佛舍，Regina一望倒d佛牌已經覺得好有好感，有幾個佛牌佢都覺得好合眼緣，最終佢就揀左其中一個帶走。自從Regina買左個佛牌之後，佢就每晚都夢見同一位男士。初時ge夢境係Regina同呢位男士係街上偶遇，及後ge夢境漸漸演變到Regina同呢位男士拍拖四圍遊玩。發夢其實無乜大不了，最慘係Regina每朝起身都覺得好疲憊，好似真係出街玩左成日一樣，漸漸仲開始影響Regina ge工作表現。
有一晚，Regina又夢見呢位男士，夢中呢位男士同Regina求婚，仲叫Regina去佢ge世界陪佢。 Regina唔肯，呢位男士就捉實Regina隻手，死命拉Regina入一個黑洞。Regina幾經掙扎，出盡九牛二虎之力先至甩倒身。
當Regina從噩夢中驚醒過來ge時候，佢覺得好疲憊，成身都係汗……手腕上仲有好明顯ge手指狀瘀痕。佢覺得好唔對路，於是就即刻打電話同Maggie講哂成件事，跟手約埋Maggie陪佢上佛舍。
去到佛舍，佛舍職員一望就話Regina有野唔妥。佢地即刻叫佛舍內ge師傅幫Regina睇?到底發生乜野事。師傅聽完Regina講哂成件事之後，就話成件事同Regina?佛舍帶走ge佛牌無關，實情係Regina俾一隻男鬼纏身，一定要做法事請走呢隻男鬼，法事收費$20,000。
Regina話無咁多錢，師傅就話性命悠關，叫Regina考慮清楚再搵佢。Maggie就拉左Regina走，叫Regina唔好再信呢d神棍。不過其後Regina都借左錢做呢場法事，只係情況並無改善，Regina依然夜夜夢到果位男士，而夢境亦都越來越可怕….
最終Maggie通知左Regina ge家人，話俾佢地知Regina出事。其後Regina ge屋企人就四出搵人幫忙，好好彩最終都搞得掂。
原來…………一切問題源於Regina係佛舍買番黎果個佛牌，果個其實係陰牌黎ge，Regina一直夢見ge男士就係果個陰牌所附ge陰靈。因為Regina正藉人生ge「衰運期」，時運低，所以陰靈見有機可乘就借機拎自己想要ge野。
據Maggie所講，其實佢第一日陪Regina去佛舍ge時候，佢都有衝動帶走佛牌，好在佢當時定力夠，無帶走任何一個佛牌，唔係佢都有可能出事。
根據師傅所講，賣陰牌ge人都會用盡方法吸引客人去佢地舖頭，因為陰牌所附陰靈其實都收倒法師指示，要設法吸引客人帶佢地走，而時運低ge客人(註﹕去得買陰牌ge人，時運好極都有限)就最易中招

danielchung

好有鬼故既感覺

但請陰既人同想請陰既人睇完之後驚唔驚

gmg168888

發人深省

kikiki

danielchung 發表於 12-2-2015 17:27
好有鬼故既感覺

但請陰既人同想請陰既人睇完之後驚唔驚

我睇完有D淆底....好恐怖....

danielchung

kikiki 發表於 12-2-2015 17:42
我睇完有D淆底....好恐怖....

唔好講笑，呢啲好堅

陰嘢入靈咪會咁囉，我仲聽過啲女請陰之後比嗰啲搞，係瞓咗嗰時發夢，有反應而且有痕跡，真係請唔過架

kikiki

danielchung 發表於 12-2-2015 17:57
唔好講笑，呢啲好堅

陰嘢入靈咪會咁囉，我仲聽過啲女請陰之後比嗰啲搞，係瞓咗嗰時發夢，有反應而且有痕 ...

仲講～師兄你想嚇死我咩～

總之～向陰牌說不～

ms9282

嚇死人咩.

jimcy

真正信佛既，唔會因為佢無果20000唔幫佢，果D所謂師傅，見錢先做野，同大陸既醫院有咩分別，再者果D師傅有幾多料無人知。

小小牛

希望社會上能有多些像 Unite 的組織，能揭開陰牌的真面目和禍害，減少有人被陰牌所害

kkk

哩D人為咗錢真係乜都做得出。