從泰國返嚟差唔多成個月,一直好想分享一件奇事但無時間,今日一於一口氣打出嚟同大家分享下
戴牌咁耐,我都唔主張太迷信,唔主張戴牌有事蹟就戴,無就結緣出去,但係今次確實係一次幾得意嘅靈驗事蹟,利申咗先,呢件係真人真事,純粹分享,唔信就當故仔睇,唔係曲線賣牌,再者呢個師傅嘅牌又貴又出得少,唔會有人炒作,睇完有興趣供請嘅自己搵,唔好PM我
話說我同班朋友去曼谷玩幾日,佢地唔信泰國佛,所以梗係唔陪我跑廟啦,咁我唯有安排自己跑一日廟玩下,但係有個Friend成日想認真識個新女友,又係咁聽我講關於佛牌嘅事,就有興趣請件牌戴下,所以我就諗住喺我會跑嘅廟入面搵塊坤平俾佢,之但係我係一個有要求嘅人,求其一面坤平牌我自己係唔會接受的,咁幫個有真實需要嘅朋友又點可以馬虎了事呢?所以喺我跑嘅廟入面鎖定呢位師傅 - 龍婆Boom, 睇下請唔請到塊師傅自己做嘅坤平嚟俾我個friend試下
有認識龍婆Boom嘅師兄都會知道佢最出名唔係做牌,係入金針,喺度講少少入金針,入金針有分定針同浮針,定針唔郁浮針郁,現時喺泰國浮針法門比較出名嘅師傅有兩位,阿贊白礦同埋龍婆Boom,我去搵龍婆Boom就係想入金針,要郁嗰隻,有師兄話我好大膽,係架,但起碼都咗今日都未死得,日日食得行得瞓得做事順利(如果留言支持夠多再考慮下分享入金針嘅經歷),咁入完金針就去睇下有無坤平供請啦(*見補充),見到幾面好靚嘅坤平,揀一輪,就諗住快快問價錢快D請再俾師傅加持,一問,出事,點解….咁貴嘅,即刻叫翻譯問返供請處個師兄,原來係師傅做嘅特別版,只得100面,重要有金符管,最後問過個Friend又接受到咁就請咗喇
咁究竟奇喺邊呢,就係個Friend(叫住朋友A先)戴咗牌嘅第一日,我同班朋友去咗行翟度翟,中間大家想睇嘅野唔同就分開行啦,其中兩個朋友行到攰去咗JJMall一間Cafe度坐低唞下,(我同另一個Friend唔喺度,去咗另一度行)坐坐下,見到有個高高地嘅靚女行咗入嚟(叫住女神先),兩頭望,好似搵人咁,望咗一陣就開始走近我朋友A張枱,跟住用英文問朋友A話手機無電,同朋友分開行走失咗,可唔可以借電話打俾個朋友,咁我朋友A好人梗係借啦,(嗱,唔係靚就借,唔靚就唔借呀,我地全部人都係好好人架,對人無分別心的)女神一開口,哦,台灣妹,朋友A就提議不如同女神去搵返佢個朋友先啦,不過我另一個Friend唔想多事,驚佢呃人,唔想去,最後女神打完電話約返個朋友就走咗喇
故事未完,朋友A擔心女神,就再發訊息俾女神個Friend確認女神搵到佢,咁當然無事啦,女神朋友就話女神想多謝佢,朋友A就俾佢加咗WeChat,直到夜晚我地Join返一齊食飯,講完呢件事,見朋友A不斷拎住手機噤噤噤,我梗係話佢出嚟一齊玩唔好成日玩手機啦,佢就話係女神不斷咁同佢傾計,女神又話自己之後都想去香港玩,總之成晚不停係咁傾,我地雖然有懷疑過女神係咪搵食嘅,或者係騙局,但係種種證據顯示佢真係純粹咁橋要搵人幫,搞到我同其他朋友都不禁講句:“唔係咁筍呀嘛~” 好彩之後嗰日女神就玩完返台灣,如果唔係我地剩返嗰兩日都應該見唔到朋友A喇
到咗呢個時候,相信大家心裡面都會有個疑問,就係朋友A係唔係高大靚仔係女見親都冧嗰款呀~~當然, 現實同幻想往往唔同嘅,假設權兄靚仔係10分,我朋友都只係6,7分咁上下,我毒男一個得3分,即係如果朋友A戴咗坤平就有咁嘅效果,咁權兄戴坤平會好大鑊,Pantip會好亂,因為情場殺手鬼見愁又再出現,繼而整個曼谷會掀起一股權兄熱潮,到時英拉要對付嘅究竟係反對黨定係權兄呢? 噢Sorry,唔好扯到咁遠,就係咁,我朋友們個個都嘖嘖稱奇佛牌嘅力量,當然,我唔主張太迷信,所以我亦都好理性咁用佛學角度分析返唔同嘅可能性,可能性如下:
A. 朋友A命中注定今年異性緣重 B. 朋友A同女神係宿世緣份,今生注定要重逢 C. 朋友A之前種嘅果報成熟,女神返嚟報恩/仇嘅 D. 純粹好運
最後,我地都有叫朋友A問咗女神一個關鍵性問題:“點解咁多人唔揀就係揀我?” 女神話環顧四周,就係覺得朋友A最可信,善良同唔會呃人,所以又再一次證明平時忍辱,持戒,起善念等個人修練比起戴咩牌更重要
故事,真係未完,最新情況就係女神真係遲D會去澳洲玩中間經香港留兩日,聽聞朋友A已經約好咗帶女神周圍玩喇,之後嘅事有機會再同大家分享
*補充: 點解特別想試龍婆Boom嘅牌呢? 就係因為以我所知師傅係精於桃花法門,即係招異性緣法門,唔係普通人緣法,師傅重有樣野出名就係省 MARK MARK刺符,我去到問起省 MARK MARK刺符,師傅都笑笑口問我點解會識呢個刺符呢? 我都唔知點答好….
|