龍小菌除罩了！真身曝光 同男友行街街

Amber

龍小菌真身現形？係咪真0架？係呀，係真0架。

今日下午近6點左右，現真身、冇戴口罩亦冇戴帽嘅蒙面女歌手龍小菌，同經理人兼疑似男友邵子風及一女性友人，一行三人喺圓方現身，正準備走人。因為圓方多狗仔隊「潛伏」，故邵子風亦相當警覺，不時左望右望，睇吓有冇記者喺附近。

之後三人去攞車，兩女坐後座，邵子風負責揸車。此時記者現身，邵子風即刻擋鏡頭，反應極大，急道﹕「影乜嘢!你哋做乜嘢!」呢個時候，坐喺後座嘅龍小菌，已經拿拿聲伏低，攞出隨身準備嘅口罩遮面。

過咗一陣，龍小菌終於冷靜番，同記者講﹕「你哋頭先都影到啦，算啦，唔好影喇。」又要求記者唔好再跟隨，之後即開車離去。

其實龍小菌真面目真係幾靚女，樣子清秀，只可惜要長期遮面，難怪面色都好似特別白。既然依家「真相」已經曝光，不如索性用呢個look示人啦。