鵬哥又試咪：X你老味 余慕蓮低胸震晒

Amber

一連兩場「詹瑞文盧海鵬紅館奇幻扮嘢大典」噚晚喺紅館開鑼，EYT一班舊同事前往撐場。71歲的鵬哥喺台上搶盡風頭，雖然經常唱甩嘴及走錯位，但扮徐小鳳、盧冠廷等維肖維妙，仲有透點大肚腩嘅羅記Look，更令人笑破肚皮。

詹Sir喺台上講粗口諧音及唱潮州粗口，鵬哥即說﹕「男人老狗就大方啲啦，X你老味。」令全場起哄。之後詹Sir出上聯不停引鵬哥「試咪」，鵬哥卻好守規矩說﹕「唔使試我，唔係隨便講，要講私下同你講。」

另一高潮位，係著上低胸晚裝嘅余慕蓮(魚毛)同鵬哥合唱「鳳閣恩仇未了情」，鵬哥又出金句﹕「後面睇就一支花，前面睇就似我阿媽。」魚毛喺台上唱到震，高八度兼頻甩嘴，鵬哥即拍拍以示鼓勵，叫佢唔好震得太利害。而另一嘉賓劉以達，同鵬哥合組「撻成一塊」，劉以達唱到「螺晒脷」，鵬哥又甩嘴，雖然冇人聽到兩個人唱咩，但仍搏得全場掌聲。

尾聲時，鵬哥同詹Sir以「試咪俠」同「吹雞俠」落台下派正能量貼紙，鵬哥興奮到唔捨得返上台。到安歌位時，一身踢死兔打扮嘅鵬哥同詹Sir獻唱《年少無知》，鵬哥有感而發話﹕「當日叫我上台做騷扮嘢，都唔知接唔接好，接又驚撐唔住，唔接又怕嘥咗，我都七張幾嘢，行路應該彎晒腰，為咗扮嘢就撐到直一直，死人都要撐！」詹Sir亦話﹕「細個睇住鵬哥演技，原來扮嘢可以永遠保持童真，要同鵬哥一齊扮嘢落去。」