《求愛》又做假？ 英國紳士Vincent+學生妹 超寸嘴

Amber

無綫嘅真人騷節目《求愛大作戰》自首集出街後，反應唔錯，除咗「綠魔」呢期hit爆，第三集嘅一班港女都個個被人起底，尤其係個Sharon。

噚晚嗰集有冇睇？噚晚嗰集一開始就有個妹妹仔（睇落似中學嘅小學生）係咁彈香港男仔，仲彈到七情上面，成個拍拖經驗豐富嘅女士一樣。佢話：「我覺得唔係好得囉，身高又唔得啦，個樣又麻麻哋啦，性格又唔得，又唔就得女仔啦，唉....」佢咁落力，即時被網民怒插：「路邊受訪那女學生個格同講野的經典程度勁過晒所有女主角」、「嗰個女學生真係極品。我諗佢可能屋企冇鏡！」唔使咁呀嘛，學生而已，唔使鬧得咁狠。無綫驚唔驚自己玩出火先？定係俾稿佢讀0架咋？

另外，一直自大到爆嘅ABC Vincent，話喺獵頭公司做嘢，同過無數唔同國籍嘅女士拍拖，片中稱為「白馬王子」，今集因為玩遊戲輸咗，而要落街問女仔攞電話。佢先係中環街頭企咗好耐，不斷話冇靚女，要搵靚女攞電話，話：「我輸俾靚女冇所謂，但係唔可以輸俾一個肥婆手上囉！」最後一個都冇。

跟住轉地方落銅記繼續攞電話，佢先嚟由外國女仔埋手，自稱英國長大嘅佢、以一啲非常唔英嘅英文問對方攞電話，不過遭到拒絕，之後分別問幾位女士都唔成功，最後一個都攞唔到，深心不忿嘅佢就當街大嗌：「香港女仔好寸！」之後再被罰要同一位女士hug，結果得一位印傭同佢hug，可能佢都係同鄉啦！！有網友就插爆佢話佢好自負，而今集嘅金句就係：

1.香港女仔好寸！
2.我輸俾靚女冇所謂，但係唔可以輸俾一個肥婆手上囉！
3.香港男仔身高又唔得啦，個樣又麻麻哋啦，性格又唔得，又唔就得女仔啦。

講真，噚晚個節目已經踢爆，話其中一個參賽者Chris根本係「媒」，並安排佢今晚出局。之前嗰啲《港男講女》(或調番轉)男男女女稍為講得寸嘴啲已經俾網民群起插爆，仲起埋底，但今次港女Sharon、英國紳士Vincent同路過嘅學生妹都咁勇於發表個人意見仲寸到咁，係咪戲劇效果增收視0架咋？